Aurten ere giro ona izan da Errebaleko festetan, sanmartinetan —larunbatean—: triki-poteoa, bazkaria, sokamuturra…
Zezen Beltz elkarteak goizeko hamarretan kapea egin zuen Azpeitiko zezen-plazan, Albizuko zezenekin. Ordu eta erdiz ibili ziren; eguraldi ederra, eta ganadua ere ondo.
Gero triki-poteoa egin zuten kaleetan, Itzeder (soinua), Egurrola (panderoa) eta Borjarekin (saxoa), anbiente politean.
Handik bazkaltzera Errebalera, Txoko jatetxera. 40 bat lagun elkartu ziren: 20 lagun Zezen Beltzekoak eta beste 20 bat Errebalekoak. Aurten batera egin dute bazkaria. Postre garaian musika berriro. Gero, 15:30ean zezen karretoia eta buruhandiak, eta 16:30ean sokamuturra, Albizuko zezenekin atzera. Sokamuturra zegoen bitartean trikitia joz ibili ziren Itzeder-eta.
Sokamuturra bukatzean, berriz ere triki-poteoa, bertsolari espontaneoez lagunduta.
Zezen Beltzek eskerrak eman dizkie hiru musikariei, giro ederra jartzeagatik.
Goian, Errebalean zezena (argazkia: Monika Juaristi)
Kapea zezen-plazan.
Bazkaria Txoko jatetxean.
Musikariekin jatetxean.
